Category Archives: Senkategoria

Verda Partio de Anglujo kaj Kimrujo festas rekordajn rezultojn

9a de majo 2021

La Verda Partio festis la plej bonajn lokajn balotajn rezultojn en sia historio kun pli da Verdaj konsilistoj en pli multaj Konsilioj tra Anglujo ol iam ajn antaŭe. Voĉdonantoj tra la tuta lando evidentigis sian esperon por pli verda estonteco post la KOVIM-pandemio.

La Verduloj gajnis entute 155 seĝojn kaj gajnis reprezenton en 18 novaj konsilioj en la ĉi-jaraj lokaj elektoj. Tio portas la nombron de Konsilioj kun Verda reprezentantaro al 141.

Kungvidanto de la Verda Partio Jonathan Bartley diris: “Denove ni vidas rekordajn rezultojn por la Verda Partio. Verda ondo balaas tra la lando, kun Verduloj gajnantaj sidlokojn en lokoj ĝis nun regitaj de Laboristoj kaj Konservativuloj. Ĉi tiuj estas voĉdonoj por nia forta vizio kaj praktikaj politikoj por verda estonteco.

Verda gvidanto Jonathan Bartley en batalo kontraŭ eldomigoj

“Ĉu en Burnley aŭ Bristol, homoj turnas sin al la Verduloj, ĉar ili scias, ke la maniero, kiel ni gajnis siajn voĉdonojn, estas la maniero, kiel ni uzos la potencon, kiun ili donis al ni : kun diligenta laboro kaj humileco. Ni ne konsideras ilian subtenon kiel senkondiĉan.

“En tempo de multnombraj krizoj oni rekonas, ke la Verduloj estas pretaj. La ŝanĝoj, kiuj okazas en la mondo, estas tiuj, kiujn ni antaŭvidis kaj ni havas la politikojn kaj la vizion ne nur por malhelpi tion kio misfunkcias, sed ankaŭ por uzi la ŝanĝojn survoje por konstrui pli bonan socion por ni ĉiuj.

“Homoj scias ke pli bona, pli verda estonteco eblas : estonteco, kie ni traktos la klimatajn kaj ekologiajn krizojn, sed ankaŭ ebligos al komunumoj en ĉiu angulo de Anglujo kaj Kimrujo prosperi”.

Forta progreso de la Skota Verda Partio

Sabato, la 8a de Majo,

Malgraŭ balot-sistemo kiu ne favoras la disvolvon de novaj aŭ minoritataj partioj, la Skota Verda Partio faris signifan progreson en la ĵus pasinta ĝenerala balotado. Kiel partneroj de koalicio kun la Skota Nacia Partio, evidentiĝas ke la Skotaj Verduloj havos gravan efikon sur la estonto de la Skota Parlamento kaj sur Skotlando pli ĝenerale. La skota balot-sistemo konsistas el nur unu rundo. Tiel kandidato ne bezonas havi absolutan plimulton por esti elektita; sufiĉas al ŝi aŭ li simple ricevi pli da balot-voĉoj ol ĉiu alia kandidato. Tamen post pozitiva kampanjo enfokusigita sur la verda ekonomia resaniĝo kaj sur la alfrontado de la klimata krizo, la Skotaj Verduloj spertis progreson en ĉiu regiono de Skotlando. Al la kvin reelektitaj Verdaj Membroj de la Skota Parlamento (MSP) aldoniĝis tri pliajn. Ĉi tio estas ĝis nun la plej bona rezulto de la partio.

La balota rezulto ankaŭ signifas, ke la Skotaj Verduloj nun konsistigas kun la Skota Nacia Partio plimulton en la Skota Parlamento favore al la sendependeco de Skotlando

Lorna Slater kaj Patrick Harvi, kungvidantoj de Skota Verda Partio

Komentante, la kun-gvidanto de la partio Lorna Slater diris:

“Kun ĉi tiu rekorda rezulto, la Skotaj Verduloj kreskigis niajn voĉojn kaj influon en Skotlando okaze de ĉi tiu elekto. Tio estas ĉar dum aliaj partioj havis taktikan aliron al la voĉdonado kaj mallongan perspektivon, la Skotaj Verduloj faris pozitivan kampanjon pri verda ekonomia resaniĝo kaj pritrakto de la klimata krizo.

“Estas klare, ke ni devas komenci labori por nova pli verda estonteco por nia lando, kaj parto de tio devas esti referendumo pri kiel Skotlando estos regata. Balotantoj donis plimulton en la Skota Parlamento al pro-sendependecaj partioj , kun la Skotaj Verduloj ludante esencan rolon, kaj nun Boris Johnson estas devigata agnoski tiun demokratan mandaton.

“La Skotaj Verduloj daŭrigos nian konstrueman rolon en la Skota Parlamento, kie ni celas plibonigi la vivon en Skotlando. Ni volas fari ke la impostoj estu pli justaj kaj la publika transporto senpaga. Ni volas protekti la naturon en Skotlando kaj la klimaton tutmonde.”


Kiuj estas la estontaj rimedoj por stoki kaj transporti energion?

https://verdularo.files.wordpress.com/2021/04/9148a-verdahidrogeno1a.jpg

Esperanta Retradio enpaĝigis hodiaŭ artikolon pri “verda hidrogeno”. La artikolo prezentiĝas kune kun akompananta son-materialon.

http://esperantaretradio.blogspot.com/2021/04/verda-hidrogeno-espero-renaskigas.html?view=magazine

En nia venonta renkontiĝo, okazonta dimanĉe, la 2an de majo je la 18a Centra Eŭropa Tempo (UTC+2), ni diskutos, interalie, la avantaĝojn kaj malavantaĝojn de tiu energi-formo.

Por eniri la retan kunvenon
https://us02web.zoom.us/j/83680657291?pwd=MEphSjkxdENnRXI0SVlKdXdxa1ZLQT09

Kunvena Identigilo: 836 8065 7291
Pasvorto: ave

Ni dankas la teamon de Esperanta Retradio, kaj rekomendas ĉiutage aŭskulti ties elsendojn por progresigi Esperanton kiel parolatan lingvon.

“Verdire, Verde kaj Verve”, unua renkontiĝo temanta pri karbo

Sub la titolo “Verdire, Verde kaj Verve” organiziĝis la unua reta renkontiĝo pri politika ekologio, la dimanĉon 18an de aprilo. Partoprenis pli ol dudek homoj el tri kontinentoj. La temo estis la historie ŝlosila rolo de karbo por nia civilizacio, kaj la grava danĝero kiun tiu materialo starigas nuntempe por la sano de nia planedo. La diskutado estis sufiĉe vigla kaj multe-flanka kaj estigis multajn demandojn kiujn ni ne havis la tempon plene pritrakti.

Resumo

La unua uzo de karbo aperis mezepoke, pro manko de ligno rezultanta de la forhako de arbaroj kaj de la kreskado de la en-urba loĝantaro. Ĝi provizis la ne malhaveblan hejtadon de domoj sed samtempe eblis konstati la haladzon kiun ĝi produktis kaj la malsanigajn efikojn de ĝia fumo. La teknologiaj rimedoj tiam disponeblaj ne permesis profundan minadon kaj ligno daŭre superregis la merkaton de brulaĵoj. Tio ŝanĝiĝis dum la naŭdeka jarcento. La perfektigo de vapormaŝinoj lanĉis la industrian revolucion, permesis profundan minadon kaj sekve la kreadon de pli multnombraj kaj pli diversaj maŝinoj. Nia civilizacio disvolviĝis, kun siaj komfortoj kaj samtempe siaj malagrablaĵoj kaj danĝeroj.

Hodiaŭ, la kreskado de la tutmonda homa loĝantaro kaj la rapida ekonomia evoluo en la antaŭe superregitaj landoj kiel Barato kaj Ĉinio, helpata ĝuste per karbo, grave kontribuas al la ellaso de forcejaj gasoj kaj sekve al la klimata ŝanĝo. Samtempe, ne ĉiuj el la pli evoluintaj landoj estas rezignintaj pri karbo. Ĉi-rilate ni aparte ekzamenis la situacion en Germanio, kiu forlasis la atoma-energion sed planas rezigni pri karbo nur ĝis la 2038a jaro. Karbo kaŭzas morton de dekmiloj da homoj en la mondo ĉiu-jare, nun precipe per poluado de la aero. Ĝi kompreneble serioze damaĝas la klimaton, tamen havas la avantaĝon esti amase minebla kaj stokebla. Se ne rigardi la malsanigan aspekton, ĝi estas kost-efika.

Dum la diskutado ni rapide elvokis diversajn eblajn solvojn. Ni ankaŭ priparolis la situacion en Afriko, kies enloĝantoj frontas malfacilan aliron al la necesajn brulaĵojn kaj devas trovi adaptitajn rimedojn kaj subtenojn kiuj permesos favoran evoluon sen endanĝerigi nian komunan estontecon.

La partoprenantoj decidis daŭrigi tiun diskutadon dum plua kunveno okazonta la 2an de majo. Du semajnojn poste ni pritraktos novan temon. Ĉiuj estas invitataj fari proponojn por niaj diskutoj kaj kompreneble partopreni.

La Ĝenerala sekretario de UNO petas la nuligon de ĉiuj karbo-projektoj por konservi ŝancon savi la klimaton

Karbo centralo kaj vent-radoj konkuras (ĉi tie en Germanio)

La pasintan mardon, emfazante, ke la mondo ankoraŭ havas “batalan ŝancon” limigi tutmondan varmiĝon per tuja kaj ambicia klimata agado, la ĝenerala sekretario de Unuiĝintaj Nacioj, António Guterres, instigis registarojn kaj privatan sektoron nuligi ĉiujn planitajn karbajn projektojn, ĉesigi financadon por karbo-bruligaj elektro-centraloj, kaj elekti anstataŭe subteni justan transiron per investado en renovigebla energio.

“Iam karbo alportis malmultekostan elektron al tutaj regionoj kaj esencajn laborpostenojn al komunumoj,” Guterres diris en video-mesaĝo ĉe la virtuala kunveno de la Alianco por Transiro el Karbo. “Tiuj tagoj forpasis.”

Elimini karbon de la elektra sektoro estas la plej grava paŝo por konformiĝi al la 1,5-grada celo,” Guterres daŭrigis, aludante al la politika celo malhelpi planedajn temperaturojn leviĝi pli ol 1,5 ° C super antaŭindustriaj niveloj. “La tutmonda karba uzo en elektroproduktado devas fali je 80% sub la niveloj de 2010 ĝis 2030,” li aldonis.

Plenumi la klimatan celon de 1,5 ° C dum ĉi tiu jardeko eblas, laŭ Guterres, sed postulos forigi “la plej malpurajn, plej poluajn kaj, jes, pli kaj pli multekostajn fosiliajn brulaĵojn de niaj elektrosektoroj.”

En sia alparolo, la estro de UN indikis tri paŝojn, kiujn devas fari publikaj aŭtoritatoj kaj kompanioj por “fini la mortigan toksomanion je karbo.”

- Nuligi ĉiujn tutmondajn karbajn projektojn jam lanĉitaj
- Fini la internacian financadon de karbaj centraloj kaj stiri la investadon al projektoj pri renovigeblaj energioj
- Komenci tutmondan klopodon por finfine organizi justan transiron.

Guterres alvokis la 37 membrojn de la Organizo por Ekonomia Kunlaboro kaj Disvolvo (OECD) – grupo de relative riĉaj landoj kun pli granda historia respondeco, pro ĉerpado de fosiliaj brulaĵoj kaj elsendado de forcejaj gasoj, kiuj kaŭzas mortigan poluadon kaj detruas la klimaton – al ” engaĝiĝo por forigo de karbo “ĝis 2030, kaj instigas ne-OCDE-landojn fari tion antaŭ 2040.

Pledante por fino al la tutmonda financado de karbaj projektoj kaj transpaŝo al subtenado de evoluaj landoj por transiro al pura energio, Guterres petis “ĉiujn multflankajn kaj publikajn bankojn – same kiel investantojn en komercaj bankoj aŭ pensiaj fondusoj – ŝanĝi siajn investojn nun favore al la nova ekonomio de renovigebla energio. “

Emfazante, ke “la transiro de karbo al renovigeblaĵoj rezultigos la netan kreadon de milionoj da laborpostenoj antaŭ 2030,” Guterres agnoskis, ke “la efiko sur regionaj kaj lokaj niveloj estos diversa.”

“Ni havas kolektivan kaj urĝan respondecon trakti la gravajn defiojn, kiuj venas kun la rapideco kaj amplekso de la transiro,” li daŭrigis. “La bezonoj de karbo-produktantaj komunumoj devas esti agnoskitaj, kaj konkretaj solvoj devas esti provizitaj je tre loka nivelo.”

La estro de UN instigis “ĉiujn landojn akcepti la gvidliniojn de la Internacia Organizo pri Laboro por justa transiro kaj adopti ilin kiel minimuman normon por certigi progreson al deca laboro por ĉiuj.”

La pandemio de koronaviruso, rimarkis Guterres, “akcelis” la malpliiĝon de la “ekonomia daŭrebleco de karbo”, dum planoj por ekonomia revigligo donas eblecon starigi verdan transformon de la monda infrastrukturo.

En multaj mondopartoj, justa transiro kongruas kun garantio de universala aliro al energio, diris Damilola Ogunbiyi, ĝenerala direktoro kaj speciala reprezentanto de la ĝenerala sekretario pri Daŭrigebla Energio por Ĉiuj.

Ogunbiyi diris al la ĉeestantoj de la konferenco, ke preskaŭ 800 milionoj da homoj en la tuta mondo ankoraŭ malhavas aliron al baza elektro, dum 2,8 miliardoj estas sen puraj kuiraj brulaĵoj.

“Ĝuste nun ni estas ĉe vojo-kruciĝo, kie homoj volas ekonomie restari, sed ili serĉas la plej bonajn ŝancojn por fari tion,” ŝi diris. “Kaj ni emfazas investojn en daŭrigebla energio por instigi ekonomian disvolviĝon, krei novajn laborpostenojn kaj doni ŝancojn al la homoj plenumi siajn tutajn kapablojn.”

Fiaskinta puĉo, fiaskonta alianco?

Trump mob storming Capitol Hill

La okupado de la usona kongreso fare de fanatikaj subtenantoj de Donald Trump estas sendube venko de sen-racieco super demokratio. Usonaj Demokratoj ne havos problemon por atribui ĉi tiun fiaskon al la frenezo de ununura homo kaj al la servila konduto tiom evidenta ĉe la Republikanoj. Tamen ĉi tiu fiasko estas la kulmino de historiaj procezoj evoluantaj ekde la koloniigo de la nordamerika kontinento. Ni ne forgesu, ke la Usona respubliko fondita en la 1787 baziĝis sur la sklaveco : ĝia tiom respektata Konstitucio estis ŝancela kompromiso, kiu garantiis al la sudaj ŝtatoj la rajton ekspluati sklavan laboristaron, same kiel brutaron, la sklavo havanta neniun juran identecon. Kaj la absurda sistemo uzata ankoraŭ nuntempe por la elekto de la Prezidanto, kaj la ekstrema malekvilibro de la reprezentado en la Senato (2 senatanoj por ĉiu ŝtato, sendepende de la nombro de ties loĝantoj) devenas de ĉi tiu tempo. La Civila Milito aboliciis la sklavecon, en la 1865a sed ĉi-lasta daŭros en aliaj formoj en la sudaj ŝtatoj. Migrante okcidenten al la senlimaj prerioj aŭ norden al la vastaj fabrikoj, la Afrik-usonanoj akiris civitajn rajtojn sed renkontis, samtempe, ĉiuspecajn diskriminaciojn, kiuj, kvankam ili malpliiĝis, daŭras ĝis hodiaŭ, kiel pruvas la multaj policaj perfortaĵoj. En la sudaj ŝtatoj la leĝa egaleco estis enkondukata nur en la jaro 1964.

Same kiel rasismo, la regado de la monaj potencoj estas konstanto en la historio de Usono. Al ĝi aldoniĝis ekde post la fino de la dua mondmilito la pezo de la milita-industria komplekso. Krome, ĉirkaŭ ĉi tiu tempo, gazeta magnato Henry Luce alvokis la regantan klason fari el la 20-a jarcento “la Usonan Jarcenton” ; kaj tiu esprimo baldaŭ fariĝis banala parto de la pripolitika vortprovizo. Kredo je la priĉia supereco de Usono estas ankoraŭ forta hodiaŭ, precipe inter la Respublikana balotantaro. Al la militismo, naciisma aroganteco, difuzaj aŭ koncentritaj formoj de rasismo, aldoniĝas la pezo de fundamentismaj religioj kaj superstiĉaj kredoj. Se eblas lamenti en Eŭropo pri la rolo de sociaj retoj, kie cirkulas ĉiuspecaj onidiraĵoj kaj bizaraj teorioj, sen la filtrilo de profesia ĵurnalismo, en Usono, jam delonge fundamentismaj evangeliistoj kaj ekstremaj dekstruloj distilas senbride siajn venenojn ĉe lokaj radistacioj.

U.S. military budget seen from Italy: More arms than ever – Workers World

Du esencaj karakterizaĵoj apartigas la Usonan politikan kulturon de la Eŭropa politika kulturo: pli granda pezo de ekstremdekstraj ideologioj kaj malpli forta laborista kaj socialisma tradicio ; tial, la iluzioj de Trumpismo unuflanke, kaj aliflanke, la malfacileco de Bernie Sanders superi en la Demokrataj antaŭbalotoj. Cetere, la unu-runda balot-sistemo marĝenigas la partiojn situantajn maldekstre de la demokratoj, precipe la Verduloj, kaj permesas al la faŝismaj tendencoj teni kiel ostaĝojn la plej respektindajn el inter la Respublikanoj.

La nov-liberala tutmondiĝo prezentas la samajn problemojn ambaŭflanke de la Atlantiko: malindustriiĝo, stagnado de malaltaj salajroj, disvolviĝo de ekonomia malsekureco. Ĉe la ideologia nivelo ni trovas en Eŭropo la samajn tendencojn kiel en Usono, sed ilia pezo kaj la manovro-kapablon, kiun la institucioj permesas al tiuj tendencoj, tute ne samas. Sume, la usonanoj estas niaj aliancanoj, sed ĉi tiuj aliancanoj estas samtempe peza ŝarĝo. Urĝas por ĉiuj eŭropanoj ĝuste taksi la koston de ĉi tiu ŝarĝo kaj la riskojn, kiujn prezentas al ni, la alianco kun potenco kies estonto estas tiom malsekura.